Угледот на Велика Британија во светот е намален во деценијата по Брегзит, изјави премиерот Енди Бернам, притоа наговестувајќи дека Лабуристичката партија би можела да се откаже од „црвените линии“ поставени кон Европа во својата следна изборна програма, пишува „Гардијан“.
Во говор посветен на надворешната политика, Бернам најави дека по самитот во Брисел оваа недела, ќе започне нови разговори со Европската унија за можностите за „долгорочни односи“. Сепак, премиерот предупреди дека овој процес ќе биде долготраен. Некои министри во неговата влада стравуваат дека повторното отворање на поделбите околу Брегзит е погрешен потег, но Бернам изјави: „Во секоја фаза, британскиот народ ќе има главен збор“.
Внатрешни притисоци и идни опции
Се очекува Бернам да ги претстави главните опции за поблиски врски со ЕУ, вклучително и царинска унија, единствен пазар или целосно враќање во членство. Тој ќе нагласи дека Лабуристите нема да ги преминат своите „црвени линии“ пред следните општи избори. Дел од владата сметаат дека, доколку дојде до поништување на Брегзит, процесот треба да се одвива побавно и да не се избрзува со одлуките.
Извори од „Даунинг стрит“ велат дека Бернам сака да ја „постави рамката за дискусија“, наместо веднаш да наметне конечно решение. Сепак, тие признаваат дека тој можеби ја искомплицирал ситуацијата со тоа што јавно ја изразил својата лична наклонетост кон враќање во Унијата.
Поддржувачите на Брегзит во последните денови започнаа две одделни кампањи со цел да ја задржат Британија надвор од ЕУ, доколку Бернам се обиде да го поништи излегувањето. Поранешните премиери Борис Џонсон и Дејвид Камерон, кои беа на спротивни страни за време на референдумот, исто така предупредија дека тоа би бил лош потег.
Во петок, на самитот во Брисел, Бернам треба да се сретне со европските лидери за да обезбеди договори кои, според него, би можеле да го зголемат БДП за 0,4 отсто, односно за околу 17 милијарди фунти. Овие договори опфаќаат области како храна и земјоделство, тргување со емисии и програма за мобилност на младите.
Во говорот одржан на банкетот во лондонскиот „Сити“, тој повтори дека постоечкиот договор на Обединетото Кралство со ЕУ не е доволно добар. Тој го спореди тоа со приказната за „новите алишта на царот“, во која никој не се осмелуваше да ја каже вистината./Извор:Makfax


