Властите во Бахреин денеска издадоа безбедносни предупредувања до населението, во време кога иранската Револуционерна гарда соопшти дека извела напад со шест беспилотни летала врз американски радарски објект во воената база Ал Рифа.
Според иранското соопштение, целта била радарска инсталација за противвоздушна одбрана. Од Бахреин, пак, беше соопштено дека противвоздушната одбрана пресретнала ирански воздушни напади. Властите ги повикаа жителите да останат смирени и да ги следат официјалните безбедносни упатства.
Засега нема независна потврда дека американскиот радар бил погоден или оштетен, ниту информации за евентуални жртви во базата. Случајот претставува ново заострување на тензиите меѓу Иран и САД во регионот на Персискиот Залив.
