Министерството за внатрешни работи предупреди дека повторно зачестиле обидите за измама преку пораки во кои граѓаните лажно се известуваат дека направиле сообраќаен прекршок регистриран од системот „Безбеден град“. Известувањата пристигнуваат преку СМС, електронска пошта и социјални мрежи.
Според МВР, целта на измамниците е примателите да отворат лажни интернет-страници и да внесат лични податоци, лозинки или информации од платежни картички. Министерството советува да не се отвораат сомнителни линкови и да не се вршат уплати преку непроверени страници.
Официјалните СМС-известувања за прекршоци преку системот „Безбеден град“ се испраќаат од ознаката „MVR-SC“, ја содржат регистарската ознака на возилото и упатуваат кон официјалниот домен safecountry.mvr.gov.mk. Секторот за компјутерски криминал презема активности за откривање на сторителите на измамите.
