На скверот пред трговскиот центар „Буњаковец“ во Скопје денеска беа поставени две маси со различни оброци како дел од герила-акција посветена на разликата меѓу студентскиот и пратеничкиот стандард. Акцијата ја организира групата „Урбани уметнички акции“.
Едната поставка претставува скромен студентски оброк со леб, конзервирана храна и зеленчук, додека другата симболично го прикажува оброкот достапен во собраниското бифе. На придружните менија се наведени цени, но организаторите јасно означиле дека станува збор за сатирична презентација.
Акцијата доаѓа по јавните барања за повисок субвенциониран студентски оброк. Форумот за образовни промени претходно најави и правни чекори поради, како што тврди, неусогласување на дневната субвенција со инфлацијата.
