Грчките истражни органи открија голема мрежа на компании за кои постои сомнение дека биле користени за избегнување даночни обврски и плаќање придонеси, со вкупен долг поголем од 203 милиони евра. Според информациите на Независната управа за јавни приходи на Грција, во шемата биле користени околу 4.200 даночни броеви и стотици компании.
Истражителите откриле дека како формални управители и сопственици биле пријавувани лица со сериозни здравствени проблеми, лица со ниски приходи, бездомници, па дури и луѓе што веќе биле починати. Во еден од случаите, лице кое починало во 2023 година продолжило да фигурира во деловната документација на повеќе компании.
Истрагата опфаќа голем број фирми, особено од угостителството и забавната индустрија. Поднесени се обвиненија против повеќе осомничени, но конкретната кривична одговорност ќе треба да се утврди во судските постапки.
