Властите им препорачаа на жителите во делови од Латвија и Литванија да побараат безбедно место, откако неидентификувани беспилотни летала (дронови) навлегоа во воздушниот простор на двете земји. Во средата, луѓето во неколку региони беа предупредени да се засолнат, додека борбени авиони на НАТО беа подигнати за да реагираат на безбедносниот инцидент.
Според достапните информации, дрон навлегол во воздушниот простор на овие земји-членки на НАТО од соседна Русија или Белорусија.
Предупредување за Каунас и затворање на аеродромот
Предупредувањето, издадено од Националниот центар за управување со кризи на Литванија, го опфати и Каунас – вториот по големина град во земјата, со околу 300.000 жители. Според извештаите, аеродромот во Каунас привремено ги прекинал сите летови.
Околу 23:00 часот беше прогласено „жолто“ ниво на тревога, а на жителите во областите Вилнус и Утена им беше препорачано да се упатат кон најблиските засолништа.
„Вооружените сили на Литванија соопштуваат: МОЖНА ЗАКАНА ОД ВОЗДУХ (ЖОЛТА). Најдете безбедно место. Ако забележите сомнителен предмет, не му приоѓајте; јавете се на 112. Почекајте додека опасноста не помине“, се наведува во официјалното предупредување.
Предупредување издадено и во Латвија
И латвиските власти издадоа предупредување, укажувајќи на потенцијална закана во воздушниот простор над општините Јекабпилс и Мадона.
„Ве известуваме за потенцијална закана во воздушниот простор на Латвија. Во моментов не се потребни дополнителни дејствија. Доколку ситуацијата се промени, ќе бидете известени преку мобилниот систем за рано предупредување, заедно со упатства за тоа како да постапите“, објавија властите на платформата Икс.
Латвиските служби подоцна известија дека опасноста поминала: „Ве известуваме дека заканата за воздушниот простор во општината Мадона е отстранета“.
Меѓусебни обвинувања во врска со залутани дронови
Украински дронови и претходно залутувале во воздушниот простор на Финска, Естонија, Латвија и Литванија, што ги зголеми стравувањата дека војната би можела да се прелее на територијата на земјите-членки на НАТО кои граничат со Русија и Белорусија.
Русија ја обвинува Украина дека го користи воздушниот простор на сојузниците од НАТО како параван за изведување напади. Киев, од друга страна, наведува дека некои од неговите дронови се оттргнуваат од планираните рути поради руското попречување на сигналите. Државите членки на НАТО ја сметаат Русија за директно одговорна за овие инциденти./Извор:Makfax
