Пет лица ќе бидат опфатени со кривична пријава по денешната полициска акција во Куманово, соопшти директорот на Бирото за јавна безбедност, Александар Јанев. Според неговото објаснување, обезбедената документација упатува на сомневања за активности што се протегаат од 2021 година.
При утринските претреси биле пронајдени пари и документи поврзани со позајмување средства и изнуда. Јанев посочи дека проверките биле проширени во нотарска канцеларија, а Народната банка била известена за контрола во поврзана менувачница.
Пријавата се подготвува во координација со Обвинителството за гонење организиран криминал и корупција. Најавено е и одземање возила, телефони и други предмети што би можеле да бидат значајни за утврдување на околностите.
