Кај дете на возраст од година и пол е потврден петтиот случај на морбили во земјава, соопшти министерот за здравство Сашо Клековски. Меѓу петте регистрирани случаи се три мали деца, 45-годишен маж и еден државјанин на Косово.
Според Клековски, првичните информации укажуваат на можна поврзаност меѓу странскиот државјанин и три од домашните случаи. Институтот за јавно здравје ја подготвува епидемиолошката анализа што треба да покаже дали тие се дел од ист синџир на пренос.
Здравствените служби ги проверуваат контактите и движењето на заразените. Министерот најави дека официјалните заклучоци за поврзаноста ќе бидат соопштени по завршувањето на анализата.
