Средношколци од седум училишта денеска во Собранието ќе разговараат со пратеници за информирањето преку социјалните мрежи, влијанието на инфлуенсерите и препознавањето содржини создадени со вештачка интелигенција. Учесниците доаѓаат од Скопје, Прилеп, Валандово, Велес и Липково.
Дебатата „Што гледаш, кому веруваш?“ ја организира Институтот за комуникациски студии во соработка со Парламентарниот институт и Клубот за младински прашања и политики. Предвидено е младите директно да ги претстават своите искуства и навики во дигиталниот простор.
Меѓу темите е и прашањето дали наставните програми соодветствуваат со современите информациски предизвици. Најавени се обраќања на претседателот на Собранието Африм Гаши и британската амбасадорка Маја Сивањанам.
