Северна Кореја денес истрела околу десетина балистички ракети кон морето, соопшти јужнокорејската војска. Ова лансирање доаѓа само неколку дена откако Пјонгјанг се закани дека ќе го обнови пропагандното емитување преку разгласи долж границата и ќе распореди ново оружје во областа што ги раздвојува двете земји, пренесува АП.
Ракетите беа истрелани неколку дена откако севернокорејскиот лидер Ким Џонг Ун, за време на викендот, оствари ненадејна посета на Кина – главниот сојузник и економски партнер на Северна Кореја – со цел зајакнување на соработката меѓу двете нации.
Здружениот генералштаб на Јужна Кореја соопшти дека е регистрирано лансирање на околу десетина балистички ракети со краток дострел од Вонсан, град на источниот брег на Северна Кореја. Јужнокорејската војска го засили надзорот и споделува информации за лансирањата со САД и Јапонија.
Тензии по експлозиите на мини на границата
Односите меѓу Северна и Јужна Кореја дополнително се влошија по експлозиите на мини минатиот месец, во кои беа повредени тројца јужнокорејски војници. Сеул ја обвини Северна Кореја за поставување на мините јужно од Воената линија на разграничување, што доведе до експлозиите на 21 септември. Пјонгјанг ја негираше одговорноста и се закани со одмазда доколку биде испровоциран.
Минатата недела, Северна Кореја најави дека ќе го обнови пропагандното емитување преку разгласи и ќе распореди нови системи за вооружување долж границата. Како причина, според нивните тврдења, ги наведоа честите предупредувачки истрели од страна на јужнокорејските војници во пограничните области.
Јужна Кореја потоа предложи разговори за попрецизно дефинирање на границата со цел да се спречат случајни судири, но Северна Кореја не одговори на предлогот.
Денешното лансирање е најновото во низата севернокорејски тестирања на оружје спроведени во текот на изминатите неколку недели. Меѓу нив беа и тестирања на крстосувачки ракети лансирани од подморници, како и хиперсонични ракети.
Аналитичарите сметаат дека, преку овие тестирања, Северна Кореја веројатно се обидува да изврши притисок врз САД за да издејствува поголеми отстапки – особено по изразената желба на американскиот претседател Доналд Трамп за обновување на дипломатските односи со Ким Џонг Ун./Извор:Makfax
