Француската влада најави серија промени во образовниот систем за да одговори на барањата на студентите и протестите што ја зафатија земјата. Меѓу предложените мерки се намалување на бројот на ученици во одредени одделенија, инвестиции во реновирање на училишните згради и промени во системот за прием на факултети.
Владата објави дека ќе се воведе поголема транспарентност за прием на факултети во 2027 година. Образовните институции треба подетално да ги објаснат критериумите за избор на кандидати, додека студентите би добиле појасни информации за причините за одбивање на апликациите. Се разгледува и замена на постојната платформа за упис, што би можела да се спроведе до 2028 година.
Меѓу најавените мерки е ограничувањето на бројот на ученици во одредени одделенија од прва година во средно училиште на максимум 28, почнувајќи од 2027 година. Владата, исто така, вети дополнителни места во високото образование, повеќе средства за студентски стипендии и поволни кредити за реновирање на училишни згради.
Според планот, до четири милијарди евра во меки заеми би биле достапни за локалните власти за реновирање на училиштата, додека се планира да се издвојат средства и за подобрување на универзитетската инфраструктура. Дел од мерките, сепак, ќе зависат од буџетските можности и идните одлуки на владата.
Студентите сметаат дека понудените мерки не се доволни
Студентските претставници ги поздравија некои од најавите, но рекоа дека владата не ги исполнила сите нивни барања и дека протестите ќе продолжат. Незадоволството, покрај условите во училиштата и системот за запишување на факултетите, се однесува и на недостатокот на наставен кадар и недоволните инвестиции во јавното образование.
Со текот на времето, протестите прераснаа во поширок бран на незадоволство, на кој се придружија синдикатите и активистите на движењето „жолти елеци“. Демонстрациите во некои градови беа придружени со насилство и грабежи, што дополнително го зголеми притисокот врз владата.
Во исто време, властите се соочуваат со ограничени буџетски можности и висок јавен долг, што го отежнува исполнувањето на барањата на демонстрантите. Иако најавените промени се обид за ублажување на кризата во образованието, студентите и синдикатите велат дека очекуваат поконкретни потези./Извор:Makfax
