Книгата ги обединува поезијата и авторските размислувања за песната и содржи предговор од Раде Силјан.
Книгата „Кругови“ од Санде Стојчевски излезе во издание на „Матица македонска“. Во неа се застапени песни од повеќе негови книги и авторски размислувања за создавањето на песната. Изданието содржи предговор од Раде Силјан и овозможува поширок увид во творештвото на еден од истакнатите современи македонски поети.
Стојчевски е поет, есеист, книжевен критичар и препејувач, добитник на наградите „Браќа Миладиновци“, „Ацо Шопов“ и на државната награда „Св. Климент Охридски“ за животно дело. Љубомир Левчев за него запишал: „Санде е еден јарок, модерен европски поет.“ Во неговото повеќедецениско творештво посебно место има работата со македонскиот јазик: со неговите стари и ретки зборови, дијалектни облици, созвучја и можности за нови значења.
Токму на тоа е посветен предговорот „Трите јазични слоја на песната“. Силјан ја чита поезијата на Стојчевски низ средбата на архаичниот, дијалектниот и стандардниот јазик. Зборови со различно потекло и употреба влегуваат во нови врски, а нивниот звук станува важен колку и она што го именуваат.
Во „Кругови“ се застапени целините „Таа“, „Великата лирска песна“, „Нè чека пат“, „Мост што звучи“ и „Сипкава преѓа е свет“. Љубовта, природата и минливоста се меѓу темите што ги поврзуваат стиховите, со нагласено внимание кон ритамот и кон значењата што се отвораат при повторното читање.
Книгата го содржи и текстот „Зошто песната е нужно непроѕирна“, во кој самиот Стојчевски ги разгледува прашањата за поетскиот исказ. Поезијата, критичкиот предговор и авторските нотации му овозможуваат на читателот да ѝ пристапи на песната од неколку страни. Изданието е дополнето со био-библиографска белешка.
„Кругови“ е достапна во книжарниците на „Матица македонска“ и на matica.com.mk.
