Индија сака да преземе поактивна улога во посредувањето за ставање крај на војната меѓу Русија и Украина, потврди вчера министерот за надворешни работи Субрамањам Џаишанкар. Истовремено, Њу Делхи ги интензивира контактите со двете страни, пренесува „Киев пост“.
„Нашиот став за овој конфликт е многу јасен: сакаме тој да заврши и сметаме дека за тоа се потребни дијалог и дипломатија“, рече Џаишанкар на Минхенската безбедносна конференција во Њу Делхи.
„Со години се залагаме за овој пристап, а во последните месеци станавме и поактивни. Токму затоа разговараме и со Русија и со Украина.“
Џаишанкар нагласи дека Индија се обидува да помогне, наведувајќи ја безбедноста на пловидбата во Црното Море како една од темите. Според него, напорите одат чекор понатаму и вклучуваат разговори за извозот на жито и енергенси, како и за „можностите за договор за ненапаѓање“.
„Овие разговори се во тек“, изјави тој. Џаишанкар првпат самостојно ја посети Украина во септември. Индискиот премиер Нарендра Моди и рускиот претседател Владимир Путин одржуваат блиски односи; тие последен пат се сретнаа во Њу Делхи во септември.
Иницијатива на САД и руски услови
Во меѓувреме, украинскиот претседател Володимир Зеленски изјави дека САД сакаат да посредуваат во нова рунда преговори меѓу Украина и Русија. Целта е овие разговори да се одржат до крајот на октомври.
Мировните напори предводени од САД главно се во застој бидејќи фокусот на Вашингтон се премести кон конфликтот поврзан со Иран.
Истовремено, Украина известува дека Русија ги интензивирала воздушните напади низ целата земја. Досегашните преговори не доведоа до чекор кон мир бидејќи Москва не се откажува од своите максималистички услови за прекин на борбите./Извор:Makfax
