Американскиот претседател Доналд Трамп најави дека ќе ги укине американските царини за ирското виски на крајот од својата дводневна посета на Ирска.
Присутните ја поздравија најавата на американскиот претседател кај 18-тата дупка, за време на церемонијата на доделување награди на турнирот Irish Open, што се одржа во голф-одморалиштето „Дунбег“ во округот Клер. Во неделата, претседателот – носејќи бела бејзбол-капа со натпис „USA“ – му го врачи трофејот на победникот, Шејн Лаури.
Тој им кажа на присутните дека разговарал за царините за виски со ирскиот премиер Михол Мартин и со голферот Лаури.
„Тие прашуваат: ’Ќе ми направите ли услуга? Ова што се случува е неправедно. Постои ли начин да ги укинете царините за ирското виски?‘ А јас реков дека, во име на Соединетите Држави, ќе ги укинам царините за ирското виски“, изјави Трамп.
За вискито произведено во Ирска и увезено во САД важи царина од 10 проценти. Вискито произведено во Северна Ирска или на други места во Обединетото Кралство не подлежи на царини.
Лаури се пошегува на прес-конференцијата по турнирот: „Ирските дестилерии наскоро би требало да ми напишат чек; ова сигурно им вреди нешто“.
Здружението на производители на ирско виски соопшти дека „целосно ја поздравува“ најавата на Трамп. „Ќе продолжиме да соработуваме со нашите европски и американски партнери за да обезбедиме враќање на нулта царина за целиот извоз на жестоки алкохолни пијалаци“, се додава во соопштението./Извор:Makfax
