Русија е на прво место по обемот на испораки на нафта и природен гас во Кина и е меѓу водечките извозници на јаглен и течен природен гас на кинескиот пазар, изјави рускиот претседател Владимир Путин.
Во својата поздравна порака до учесниците на Осмиот руско-кинески енергетски бизнис форум, кој започна денес во Владивосток, Путин рече дека енергетиката традиционално е една од најзначајните и најдинамичните области на економска соработка меѓу двете земји, објави веб-страницата на Кремљ.
„Русија сигурно е на прво место по обемот на испораки на нафта и природен гас до кинеските потрошувачи и е меѓу водечките извозници на јаглен и течен природен гас. Во Кина, изградбата на неколку енергетски блокови на нуклеарни централи со руски дизајн успешно завршува“, рече Путин.
Според него, Русија и Кина заеднички развиваат технолошки иновации насочени кон зголемување на ефикасноста и еколошката безбедност на експлоатацијата, преработката и транспортот на јаглеводороди.
Путин изрази очекување дека овогодинешниот форум ќе биде значаен и продуктивен, како и дека предложените идеи и иницијативи ќе бидат спроведени во пракса, пренесува Танјуг./Извор:Makfax
