Украинските и финските одбранбени компании потпишаа договори за заеднички развој и производство на дронови во Финска. Беспилотните летала ќе бидат наменети за украинската армија и европскиот пазар.
Партнерството вчера го објави украинскиот претседател, Володимир Зеленски, по средбата со финскиот претседател, Александар Стаб, во Киев, каде што разговараа за соработка во одбранбената индустрија, објави „Киев пост“.
„Денес правиме уште еден чекор во продлабочувањето на нашата соработка и комбинирањето на украинското воено искуство со финската технологија“, објави Зеленски на „Фејсбук“.
Претседателот објасни дека потпишаните документи вклучуваат заедничко производство на беспилотни летала, проширување на капацитетите за беспилотни поморски системи и основање на заедничко вложување за производство на копнени роботски системи.
Зеленски нагласи дека договорот е постигнат во важен момент, на Денот на националното знаме на Украина и во пресрет на Денот на независноста. „На овие важни датуми, особено ја чувствуваме вредноста на вистинското пријателство“, рече тој и им се заблагодари на Стаб, финската влада, претприемачите и народот на Финска за нивната цврста поддршка од почетокот на руската инвазија.
Договорот со Финска е дел од поширока дипломатска иницијатива на Киев, наречена Договор за дронови, која има за цел да обезбеди долгорочни договори за одбранбена соработка. Украина потпиша слични договори со Естонија и Холандија на 7 јули, за време на самитот на НАТО во Анкара.
Зеленски ги опиша договорите во тоа време како полноправна соработка што вклучува заедничко производство на дронови, развој на технологија и систематски извоз на оружје. На истиот самит, Зеленски и Стаб одржаа состанок на кој се договорија за условите за финализирање на билатералниот договор за беспилотни летала./Извор:Makfax
