Денес во Делчево се одржа информативен ден за активните мерки од Оперативниот план за вработување за 2026 година и активните јавни повици од мерките „Вработување и раст на правни субјекти“ и „Обука на работно место кај конкретен работодавач“.
Пред голем број на претставници на бизнис секторот заменик-министерот за економија и труд Марјан Ристески и раководителката на Агенцијата за вработување од Делчево Маја Вирчанска пред присутните лица ги презентираа двете мерки, начинот и потребните критериуми за користење на бенефитите од двете мерки, како и постапката за аплицирање.
– Вкупниот буџет за мерката „Вработување и раст на правни субјекти“ изнесува 5,4 милиони евра, вкупниот опфат изнесува 1385 лица, а интересот е голем. Оваа мерката за поддршка за отворање на нови работни места, покрај тоа што е една од најпопуларните, истовремено е и една од најуспешните, бидејќи според податоците на Агенцијата за вработување преку 80 проценти од лицата кои се ангажирани преку оваа програма остануваат во работен однос и по истекот на периодот на субвенционирање – кажа заменик-министерот Ристески.
Градоначалникот на Делчево Иван Гоцевски истакна дека како локална самоуправа, силно ги поддржуваат сите активности што создаваат нови работни места, го поттикнуваат развојот на малите и средните претпријатија и придонесуваат за посилна локална економија.
– Во Делчево дури 44 правни субјекти аплицирале по мерката од Оперативниот план за вработување за мерката Вработување и раст на правни субјекти со можност за вработување на 65 невработени лица. Ги повикувам сите стопанственици, идни претприемачи и невработени лица да ги искористат овие можности, да се информираат и да аплицираат за мерките што најмногу одговараат на нивните потреби. Само преку партнерство меѓу институциите, бизнис-заедницата и граѓаните можеме да создадеме услови за одржлив економски развој и подобар животен стандард. Општина Делчево и понатаму ќе биде активен партнер во сите процеси што значат економски напредок, отворање нови работни места и задржување на младите во нашиот град – кажа градоначалникот Гоцевски.
Сите правни лица заинтересирани можат да добијат детални информации за мерката во работните клубови на 30-те Центри за вработување на Агенцијата за вработување на Република Македонија, контакт центарот 02-3111-850 и веб-страната (https://av.gov.mk/).
Јавниот повик за мерката „Вработување и раст на правни субјекти“ трае до 24 јули (петок) 2026 година.
фото Министерство за Економија
