Соопштение на Левица:
Наодите што ги објави Основното јавно обвинителство Гостивар ја соголуваат целата чудовишна димензија на катастрофата! Во системот за вода за пиење со пумпи била внесувана тешко загадена површинска вода од отворен канал, преплавена со фекални бактерии по налог на раководни лица од јавното претпријатие. Имало 48 пати повеќе фекални бактерии од максимум дозволеното. Во примерокот од каптираниот извор, каде што не смеело да има ниту една колиформна бактерија, биле пронајдени 39. Во водата од чешма, пак, била измерена концентрација на резидуален хлор повеќе од двојно над максимално дозволеното! Наместо да ја запрат катастрофата, тие практично извршиле двојно труење на населението, па прво во водоводот внеле вода преплавена со колиформни бактерии, а потоа, откако очигледно сфатиле што направиле, системот го преполниле со хлор во концентрација повеќе од двојно над дозволената. Така, гостиварци биле изложени и на бактериолошка контаминација и на опасна хемиска импровизација – не добиле санација, туку нов слој ризик врз веќе загадената вода.
Со други зборови, на гостиварци низ чешмите не им била испорачувана вода, туку отров!
Уште пострашно е што ова не траело неколку минути. Налогот за поставување на пумпите бил даден на 25 јуни, а на 16 јули две од нив сè уште ја префрлале загадената каналска вода во затворениот водоснабдителен систем. Речиси три недели еден цел град бил изложен на опасност, додека институционалниот апарат бил во кома!
Каде биле Министерството за здравство, Институтот за јавно здравје, Центарот за јавно здравје Тетово, санитарната инспекција, Агенцијата за храна и ветеринарство, Општина Гостивар и сите служби платени да го чуваат здравјето на населението? Како е можно загадена вода со пумпи да се внесува во главниот цевковод, а ниту една контролна ламба во системот да не се вклучи? Како е можно стотици граѓани да бараат медицинска помош, а државата да се однесува како нем набљудувач на труење што се одвива пред нејзините очи?!
Особено алармантно е што на 29 јуни, четири дена по налогот за поставување на пумпите, Центарот за јавно здравје Тетово издал стручно мислење, потпишано од Берун Мустафа, дека испитаниот примерок вода одговара на законските и стручните прописи. Центарот за јавно здравје Тетово не е приватна лабораторија ниту општинска служба, туку дел од централниот здравствен систем, со директор именуван од министерот, под надзор на Министерството и под стручно-методолошко следење на Институтот за јавно здравје.
Обвинителството мора итно да ја обезбеди оригиналната документација, лабораториските протоколи, електронските записи и целата комуникација поврзана со спорното мислење од 29 јуни. Паралелно, Државниот санитарен и здравствен инспекторат мора да спроведе вонреден инспекциски надзор над Центарот за јавно здравје Тетово, Министерството за здравство да ја утврди управната и раководната одговорност, а Институтот за јавно здравје да ги преиспита методологијата, местото и времето на земање на мострата, применетите анализи и валидноста на издаденото мислење.
Апсењето на тројца раководители од ЈП „Комуналец“ Гостивар не смее да стане удобен параван зад кој ќе се сокријат сите други. Истрагата мора да оди вертикално и хоризонтално кон секој што наредил, извршил, знаел, премолчел, погрешно информирал или по службена должност морал да ја спречи катастрофата.
Покрај локалната, централната власт е врвот на системот што требало да контролира, предупреди и интервенира, а и тој систем целосно капитулирал! Додека во водоводот со недели се вбризгувала загадена каналска вода, локалната власт и државните здравствени и инспекциски институции или не знаеле што им се случува пред очи, или знаеле и молчеле – и двете можности се подеднакво скандалозни!
Додека властите продолжуваат да ги претвораат институциите во партиски филијали, граѓаните се заложници на нестручноста со брутални последици.
