Претседателката Гордана Сиљановска-Давкова од денеска престојува во официјална посета на Република Словачка.
Утре, 02 јуни 2026 година, вторник, во Братислава, претседателката Сиљановска-Давкова ќе биде пречекана со највисоки државни и воени почести од претседателот на Република Словачка, Петер Пелегрини. Предвидено е претседателите да одржат тет-а-тет средба, по што следи пленарен состанок на македонската и словачката делегација.
Сиљановска-Давкова ќе оствари средба и со претседателот на Националниот совет на Република Словачка, Рихард Раши, како и со потпретседателот на Владата на Република Словачка и министер за одбрана, Роберт Калињак.
Предвидено е претседателката Сиљановска-Давкова да положи венец пред Споменикот на слободата, во меморијалната област Девин.
Сиљановска-Давкова во Националниот центар за култура и образование во Братислава ќе ја посети групната изложба „Од глаголица до светлина: Визуелна ода за Св. Кирил и Методиј“, со дела на македонските уметници: Ана Митевска, Ангел Коруновски, Лазе Трипков и Александра Костадиновска.
фото Кабинет на Претседател / 19.05.2026
ПОПУЛАРНО НА ИНТЕРНЕТ...
