Претседателот на САД, Доналд Трамп се огласи на својата мрежа Truth Social, обвинувајќи го Иран дека не го исполнил ветувањето за отворање на Ормускиот теснец и дека со тоа ги крши меѓународните закони и ја загрозува глобалната безбедност.
„Иран вети дека ќе го отвори Ормускиот теснец и свесно не го направи тоа. Со тоа предизвика вознемиреност, нарушувања и страдање кај многу луѓе и држави ширум светот. Тврдат дека поставиле мини во морето, иако речиси целата нивна морнарица и поголемиот дел од средствата за поставување мини се уништени.
Можеби и го направиле тоа, но кој сопственик на брод би бил подготвен да ризикува? Со тоа нанесоа голем срам и трајна штета на угледот на Иран и на она што остана од нивното раководство, но сега сме над тоа. Како што ветија, мора веднаш да започнат процес на отворање на овој меѓународен пловен пат – и тоа брзо. Ги кршат сите можни закони.
Целосно сум информиран од потпретседателот Џеј Ди Венс, специјалниот пратеник Стив Виткоф и Џаред Кушнер за состанокот што се одржа во Исламабад, под водство на пакистанскиот фелдмаршал Асим Мунир и премиерот Шехбаз Шариф.
Станува збор за исклучителни луѓе кои постојано ми се заблагодаруваат што спречив војна со Индија која ќе однесеше од 30 до 50 милиони животи. Секогаш го ценам тоа – нивото на човечност за кое зборуваат е тешко да се сфати.
Состанокот со Иран започна рано наутро и траеше речиси цела ноќ – речиси 20 часа. Би можел да изнесам многу детали и да зборувам за постигнатите работи, но важно е само едно – Иран не сака да се откаже од своите нуклеарни амбиции. Во многу нешта се постигнати договори подобри од продолжување на воените операции до крај, но тоа е неважно во споредба со фактот дека нуклеарното оружје може да дојде во рацете на толку нестабилни, барачки и непредвидливи луѓе.
Моите тројца претставници, како што минуваше времето, очекувано развија коректен и пријателски однос со иранските преговарачи – Мохамад Багер Галибаф, Абас Арагчи и Али Багери – но тоа не го менува фактот дека тие останаа целосно непопустливи по најважното прашање.
Како што велам од самиот почеток и со години – Иран никогаш нема да има нуклеарно оружје.“/Извор:Makfax
