Шефот на кинеската дипломатија, Ванг Ји, се сретна во Пекинг со советникот за национална безбедност на британскиот премиер, Џонатан Пауел, и рече дека, како постојани членки на Советот за безбедност на Обединетите нации, Кина и Велика Британија имаат значајна одговорност за светскиот мир и развој.
Ванг, член на Политичкото биро на Централниот комитет на Комунистичката партија на Кина (КПК) и директор на Канцеларијата на Централната комисија за надворешни работи, објави дека поради сложената и нестабилна меѓународна ситуација, двете страни треба да ги почитуваат целите и принципите на Повелбата на ОН, да го зајакнат дијалогот и соработката, да работат заедно за решавање на предизвиците и заеднички да го заштитат меѓународниот систем со ОН во неговиот центар, пренесува „Синхуа“.
Тој исто така рече дека посетата на британскиот премиер Кир Стармер на Кина е прва официјална посета на британски премиер во последните осум години.
Пауел изјави дека Кина е втора најголема економија во светот и земја со големо влијание.
„Отсуството на состаноци на високо ниво меѓу Велика Британија и Кина со години не е во интерес на народите на двете земји“, рече британскиот функционер.
Велика Британија се надева дека ќе ја искористи посетата на премиерот Стармер за подобрување на дијалогот и соработката на сите нивоа и низ секторите со Кина, како и за развој на покохерентно и сеопфатно стратешко партнерство, рече Пауел.
Двете страни разменија мислења и за меѓународни и регионални прашања од заеднички интерес, вклучително и кризата во Украина, според „Синхуа“, пренесува Танјуг./Извор:Makfax
