Центарот за аналитика и комуникации на ЦИВИЛ соопштува дека дека за денеска, вториот круг од локалните избори, со почеток од 7 часот започна со работа и комуникација. Закажани се четири термини за прес конференции во живо и интензивна комуникација со јавноста, медиумите и сите засегнати граѓанки и граѓани. Во текот на целиот ден ќе се објавуваат извештаи од теренот, како и едукативни и други видео содржини што произлегуваат од „Демократски навигатор“, проект кој претставува стратешки одговор на дезинформациите и хибридните закани, со фокус на изборниот процес 2025.
Прес конференциите ќе се емитуваат во живо на Фејсбук страната и Јутуб каналот на ЦИВИЛ, а редовни извештаи ќе се објавуваат и на веб страниците ЦИВИЛ Медиа на македонски и Дрејт на албански, додека меѓународната јавност ќе биде информирана преку веб страницата CIVIL Today на англиски. Видео обраќањата ќе бидат на македонски и албански.
Онлајн прес конференции ќе се одржат во 11:00, 14:00 и 17:00 часот. По затворањето на избирачките места, извештај и првична оценка на изборниот ден ќе има во 21:00 часот. Во меѓувреме, на медиумската платформа на ЦИВИЛ цело време ќе се објавуваат извештаи на македонски, албански и англиски јазик.
ЦИВИЛ ќе биде отворен за сите информации што доаѓаат и од други засегнати страни – невладини организации, мониторинг мисии, граѓанки и граѓани, како и од учесниците во изборната трка. Сите извештаи од теренот што ќе ги доставуваат набљудувачите на ЦИВИЛ, како и пријавите од надворешни извори ќе бидат подложени на стандардна проверка и верификација.
Сите медиуми се добредојдени да ги преземаат содржините на ЦИВИЛ со молба да се наведе изворот. ЦИВИЛ ќе отвори и Зум линк за видео комуникација со медиумите во термините за прес конференции, но и во други термини, по барање на редакциите.
Во понеделник напладне ЦИВИЛ ќе започне со објавување на целосни извештаи, оценки и анализи на изборниот процес, а претставници на организацијата ќе бидат на располагање на медиумите за изјави и интервјуа. Тие извештаи ќе ги откријат сите детали, називи на политичките партии и институции, како и имињата на сите што се наоѓаат во извештаите од мониторингот. Како и секогаш, ЦИВИЛ ќе објави и анализи и препораки што произлегуваат од работата на организацијата.
