Патувањето во Грција ова лето носи нови правила за сите возачи, вклучително и туристите од Македонија. Од 13 септември, во сила стапува изменет и значително построг Закон за сообраќајна безбедност, кој воведува сериозни казни за прекршувачи, особено оние што користат мобилен телефон додека управуваат возило.
Овие измени се дел од напорите на грчките власти да ја зголемат безбедноста на патиштата, особено поради фактот што досегашните регулативи се покажале како неефикасни. Иако мерките се делумно насочени кон домашните возачи, тие важат и за странци, вклучително и за македонските граѓани кои патуваат на одмор.
Во исто време, слични мерки веќе се применуваат и во Бугарија – каде што од 1 август се спроведува контрола на просечна брзина на одредени делници, користејќи камери на патарините. Таму, прекорачување на дозволената брзина за повеќе од 40 км/ч надвор од населено место може да резултира со казна од 600 лева (околу 300 евра) и суспензија на возачката дозвола за два месеци.
Во Грција, новите казни се особено строги за користење мобилен телефон додека се вози:
Прво прекршување: 350 евра парична казна + одземање дозвола за 1 месец
Второ прекршување: 1.000 евра + одземање дозвола за 6 месеци
Трето прекршување: 2.000 евра + одземање дозвола за 1 година
Ако користењето мобилен телефон доведе до сообраќајна несреќа, санкциите се значително посериозни:
Прв прекршок со несреќа: 350 евра и одземање дозвола за 1 месец
Втор прекршок со несреќа: 2.000 евра и суспензија на дозвола за 4 години
Трет прекршок со несреќа: 4.000 евра, одземање дозвола за 8 години и можност за казна затвор
Во случаи кога поради вакво однесување дојде до тешки телесни повреди, затворската казна може да достигне до 10 години. Доколку има смрт на лице, казната се движи до 20 години, а ако животот го загубат повеќе луѓе, предвидена е и доживотна казна затвор.
Максималната дозволена брзина на грчките автопати останува 140 км/ч, иако се водат дискусии за намалување на границата на 130 км/ч. Новите општински камери ќе можат да регистрираат прекршувања на брзината и во населени места.
Со оглед на сериозноста на мерките, возачите од Македонија кои планираат патување кон грчките летувалишта се повикуваат на висока претпазливост и почитување на сообраќајните правила, со цел да избегнат високи казни, губење на возачка дозвола или уште построги последици.
НАЈЧИТАНО НА ИНТЕРНЕТ...
