Интегрален текст од денешното соопштение на ДУИ:
Демократската унија за интеграција ja изразува својата најдлабока огорченост и револт за скандалозниот настан што се случи синоќа во Куманово, за време на кошаркарскиот натпревар меѓу Северна Македонија и Романија, каде во присуство на највисоки државни функционери, вклучително и премиерот Христијан Мицкоски, градоначалникот на Куманово Максим Димитриевски, министерот за внатрешни работи Панче Тошковски и заменик премиерот Иван Стоилковиќ, се слушаа антиалбански скандирања, рацистички извици и чист говор на етничка омраза против Албанците!
Наместо спортски натпревар и манифестација на заедништво, овој настан се претвори во театар на примитивен национализам и колективна омраза, нешто што нема место во едно општество кое тежнее кон членство во Европската Унија.
„Добар Шиптар е мртов Шиптар“, „Гасна комора за Албанците“, „Чиста Македонија“, се пораки кои не враќаат во најмрачните периоди на европската историја, и кои не смеат да се релативизираат, да се премолчат и да се толерираат.
Уште поалармантно е молкот на организаторите, на Кошаркарската федерација, на МВР, на Општина Куманово, на Владата и на секој присутен претставник на институциите на таа трибина исполнета со омраза.
Немаше институционална реакција, немаше морална осуда, ниту политичко дистанцирање. Само одобрение преку молк, што за нас е исто толку тешко како и самите скандирања.
За нас во ДУИ, овие акти се голем аларм за демократијата, за соживотот и за безбедноста на граѓаните во оваа земја. Никој нема право да промовира етничко чистење на спортски натпревари и никој нема право политички да си игра со чувствата на еден народ кој дал извонреден придонес во изградбата на оваа држава.
Затоа, бараме:
• Итна истрага за инцидентот од страна на МВР и Јавното обвинителство,
• Санкции за организаторите,
• Официјална реакција и јавно дистанцирање од Владата и сите присутни функционери,
• Вклучување на меѓународниот фактор за следење на ширењето на говорот на омраза и институционалниот национализам.
Сите треба да знаат: Нема да дозволиме оваа земја да се претвори во арена на етничка омраза. Нема да дозволиме Албанците да бидат цел на фашистички повици. И нема да молчиме, ниту сега, ниту во иднина.
ПОПУЛАРНО НА ИНТЕРНЕТ...
