Европската Унија веќе подготви листа на царини со вкупна вредност од 21 милијарда евра за увоз на американска стока доколку САД и блокот не постигнат трговски договор, изјави денес италијанскиот министер за надворешни работи, Антонио Тајани.
Во интервју за „Ил Месаџеро“ тој рече дека Европската централна банка треба да разгледа нова програма за купување обврзници за квантитативно олеснување и понатамошно намалување на каматните стапки со цел да ѝ се помогне на економијата на еврозоната.
Како што изјави, подготвениот пакет европски царини би можел да биде проследен со уште еден сет доколку договорот со САД не се реализира.
„Царините им штетат на сите, почнувајќи од САД. Ако берзата падне, тоа ги става во опасност пензиите и заштедите на Американците“, рече тој.
Тој изјави дека целта е да нема никакви царини и да се воспостави отворен пазар меѓу Канада, САД, Мексико и Европа, пренесува „Танјуг“.
Американскиот претседател Доналд Трамп минатата недела објави дека производите увезени во САД од ЕУ и од Мексико ќе бидат предмет на царини од 30 проценти, почнувајќи од 1 август, по што италијанската опозиција ги критикува Џорџa Мелони и нејзината партија за спуштање на главите пред заканите од Вашингтон.
Претседателката на Европската комисија, Урсула фон дер Лајен, изјави дека Брисел засега нема да преземе мерки против американските царини за челик и алуминиум со надеж дека ќе се постигне договор со кој ќе се избегнат пошироки царини од 30 проценти за целиот извоз./Извор:Makfax
