Министерот за здравство, Азир Алиу денеска ја посети Клиниката за ТОАРИЛУЦ, во рамки на која е во напредна фаза темелна реконструкција на КАРИЛ.
-Оваа реконструкција е согласно најсовремените европски и светски стандарди, која е прва од ваков тип од основањето на клиниката. Клиниката за ТОАРИЛУЦ, предводена од проф.д-р Марија Јовановски Срцева е успешен пример за менаџирање и домаќинско раководење. Со отчетно и транспарентно работење денес имаме резултати кои се мерливи и видливи, рече министерот Алиу.
Тој соопшти дека покрај реконструкцијата на КАРИЛ, обезбедени се двојно повеќе материјали за интервенции, во рамки на постојниот буџет, а од сопствeниот буџет обезбедени се средства и за реконструкција на Клиниката за трауматологија, а раководството на ТОАРИЛУЦ презема корективни мерки за подобрување на условите како за пациентите, така и за здравствените работници. По повод една година од назначувањето на проф.д-р Срцeва, сакам да и честитам на директорката за посветената работа и заложбите за унапредување на овој исклучително значаен сегмент од терциерната здравствена заштита, истакна министерот Алиу при денешната посета, додавајќи дека пациентите на интензивна нега заслужуваат повисок степен на здравствена нега и услуга.
-Проектот за темелна реконструкција на КАРИЛ е веќе во напредна фаза, а инциран е и проект за реновирање на Ургентниот центар, за кој веќе клиниката е во фаза на аплицирање, со цел Ургентниот центар да добие нов модерен лик по примерот на врвните светски ургентни центри.
Во однос на зајакнување и надополнување на кадарот, во моментов во тек е постапка за вработување на 20 медицински сестри и 4 доктори на медицина, а веќе е завршена постапката за 34 лица од помошно – технички персонал и 8 специјализанти за вработувања, како и специјализации за 40 нови кадри, информираше министерот Алиу.
– Директорката проф.д-р Марија Јовановски Срцева го информираше министерот дека откако ја има преземено функцијата директор на клиниката, се спроведени видливи и суштински промени, паралелно на справувањето со здравствената криза во Кочани каде 86 пациенти беа навремено згрижени, тријажирани и транспортирани кон медицинските центри во странство.
– R Реализиравме или во фаза на реализација се над 23 проекти и иницијативи за една година. Во рамки на постојниот буџет, двојно ја зголемивме количината на материјали за интервенции кои ги набавуваме, Клиниката денес нема долгови, а со домаќинско работење обезбедивме средства за реновирање на Клиниката за трауматологија каде условите се супстандардни. Воведовме и две нови медицински техники – една за интензивно лекување, друга за оперативна поддршка на ‘рбетниот столб. За првпат после повеќе од 10 години заедно со ФЗОМ договоривме нови зголемени цени и пакети за интензивна нега, посочи директорката проф.д-р Марија Јовановски Срцева.
Директорката на ТОАРИЛУЦ, проф.д-р Марија Јовановски Срцева информираше дека изминатиот период за првпат на клиниката е трансплантирана коска од починат донор кај 13 годишно дете со вродена деформација на прстите, а извршени се и над 10 трансплантации на ортопедија, со иновативни методи кои првпат се применуваат кај нас. Обезбедена е најсовремена „point-of-care“ дијагностика на КАРИЛ, односно најсензитивна молекуларна технологија, веднаш до креветот на пациентот, со цел анализите да се прават таму каде што се најпотребни – со брзина, прецизност и според индивидуалните потреби на секој пациент.
Како резултат на покажаните успеси со раководењето на ТОАРИЛУЦ, министерот Алиу предложи директорката на ТОАРИЛУЦ проф.д-р Срцева да биде член на Здравствениот совет како советодавно тело на министерот.
фото Министерство за здравство
