Американскиот претседател Доналд Трамп се согласи да го продолжи рокот за трговски разговори со Европската унија (ЕУ) до 9 јули, откако претседателката на Европската комисија изјави дека на блокот му е потребно повеќе време за да постигне „добар договор“.
Претседателката на Европската комисија, Урсула фон дер Лајен, претходно во неделата објави на социјалните мрежи дека ЕУ е подготвена брзо да започне трговски преговори со САД, но дека е потребно повеќе време за да се постигне договор. Фон дер Лајен во објава на Икс изјави дека имала „добар“ телефонски разговор со Трамп.
„Имавме многу убав разговор и се согласив да го поместиме рокот. Таа рече дека ќе се сретнеме многу наскоро и ќе видиме дали можеме да договориме нешто“, рече Трамп, враќајќи се во Вашингтон по викендот во Њу Џерси.
Трамп во петокот изјави дека е незадоволен од темпото на трговските преговори со ЕУ и се закани дека ќе воведе царини од 50 проценти за сите стоки од ЕУ почнувајќи од 1 јуни.
На почетокот на април, Трамп постави рок од 90 дена за трговски преговори со ЕУ, кој треба да истече на 9 јули./Извор:Makfax
