Претседателот на Советот на Град Скопје и поранешен министер за финансии од редовите на ВМРО-ДПМНЕ, универзитетскиот професор Трајко Славески, на Твитер изрази силна поддршка за иницијативата на партиите на Албанците во Владата за отворање на „Академско здружение за наука и уметност на Албанците“. Ова здружение, според Славески, би било пандан на МАНУ и би претставувало значаен придонес во развојот на општеството и науката.
„Силно ја поддржувам иницијативата за основање на Научно-уметничко друштво (НУД) со работен наслов „албанска Академија на науките и уметностите“ со седиште во Тетово,“ напиша Славески. Според него, науката игра клучна улога во прогресот на едно општество и оваа нова академија би можела да придонесе кон тоа.
Славески додаде дека очекува ваквото друштво да помогне во јакнењето на свеста за важноста на науката и да даде конкретни придонеси во општествената и економската сфера, како и во развојот на индустријата. „НУД може да придонесе за јакнење на свеста за важноста на науката, а низ конкретни проекти да даде продонес во општествената сфера и развојот на економијата и индустријата во нашата земја,“ објасни Славески.
