Од 1 март на домашните миленици како кучиња, мачки, риби и мали птици им е дозволено да престојуваат во домовите за стари лица во Франција, но под одредени услови, бидејќи за нив ќе се грижат нивните сопственици, а не персоналот во домовите.
Во петокот француската влада даде зелено светло за прием на домашни миленици во домовите за стари лица.
Ова особено овозможува „луѓето во домовите да не бидат изолирани и да имаат континуитет во однос на она што го имале претходно“, соопшти Националната асоцијација на институции и домови за стари лица.
„Тоа е навистина мерка која е исклучително важна“, велат од организацијата, додавајќи дека домашните миленици имаат благотворни ефекти во борбата против стресот и изолацијата.
Сепак, домашните миленици ќе им бидат дозволени само на постари лица кои се автономни и можат сами да се грижат за нив.
Нема да бидат дозволени невообичаени миленичиња како змии или животни кои можат да бидат агресивни.
Домовите за стари лица ќе мора да ги приспособат и уредат своите простори, како и да воведат внатрешни прописи.
