Претседателот на ВМРО ДПМНЕ Христијан Мицкоски на отварањето на партискиот изборен штаб во Куманово упати грст навреди кон опозициските политички субјекти кои не се дел од коалицијата која ја предводи неговата партија.
Испратените пораки имаат посебна специфика бидејќи токму од Куманово потекна идејата за формирање на ЗНАМ, партијата на Максим Димитриевски.
За Мицкоски т.н. трет пат не постои и секој глас даден за новата партија на Максим Димитриевски- ЗНАМ или за кој било друг субјект претпоставува ситнење на отпорот.
„Немојте да дозволите тие лажни патриоти и популисти да ви кажуваат како треба. Ние знаеме како треба. Да се обединиме околу коалицијата на ВМРО ДПМНЕ. На следните избори ќе се одлучува меѓу нас и СДСМ. Нема трета опција, немојте да дозволите да не делат“, рече Мицкоски.
Освен тоа, Мицкоски директно му се закани на Димитриевски да си ја чува градоначалничката фотеља, најавувајќи дека токму тоа ќе биде следниот чекор на ВМРО ДПМНЕ, по претседателските и парламентарните избори.
„Ќе бидам најсреќниот човек кога во октомбри 2025 година конечно ќе го видам Куманово слободно со градоначалник од редовите на ВМРО ДПМНЕ. Тоа е нашата цел’, рече Мицкоски.
