Денеска, 31.01.2024 година, министерот за внатрешни работи Панче Тошковски, заменик министерот Назим Буши и дополнителниот заменик министер Митко Бојмацалиев остварија работна средба со висока делегација на ОДИХР предводена од г-ѓа Кеара Касталдо, виш советник за изборни процеси во Канцеларијата на ОБСЕ.
На средбата министерот Тошковски се заблагодари за соработката и напорите кои ОДИХР во континуитет ги вложуваат во насока на транспарентно спроведување на секој изборен процес во државата.
На прашање на г-ѓа Касталдо за нивната улога во изборниот процес, министерот Тошковски изрази верување дека најважно е што Мисијата на ОДИХР повторно ќе ја одигра една од главните улоги и во овој изборен процес и транспарентно ќе ја претстави целокупната ситуација на терен во насока на спроведување на фер и демократски избори.
Целото раководство на Министерството изрази уверување дека ќе бидат вложени максимални напори за учество во целокупниот изборен процес кој е пред нас со цел организирање и спроведување фер, демократски и безбедни избори.
