Претседателот Стево Пендаровски денеска ги прими трите ученички, учеснички на меѓународната олимпијада по англиски јазик „HIPPO“ 2023, којашто се одржа во Рим.
Претседателот Пендаровски ѝ честиташе на средношколката Ана Радеска од Скопје за освоеното прво место на олимпијадата во категоријата „Hippo 3”, како и на Катја Гогова од Богданци и Тамара Николовски од Битола, за постигнатите успеси и пласманот во финалето.
Во разговорот, претседателот Пендаровски истакна дека е особено горд што две години по ред ученици од земјава го освојуваат првото место на оваа меѓународна олимпијада. Тоа, како што потенцираше претседателот Пендаровски, е потврда за квалитетот којшто го поседуваат нашите ученици. Истовремено, ги охрабри и натаму да продолжат да ги надградуваат своите знаења и да постигнуваат уште поголеми меѓународни успеси.
Ученичките и нивните менторки, на средбата, посочија дека олимпијадата е одлична можност за промовирање на важноста и неопходноста од познавање на англискиот јазик, како и за зближување на младите од целиот свет, културно запознавање и унапредување на соработката помеѓу наставниците по англиски јазик.
Меѓународната олимпијада „HIPPO“ се организира од 2012-та година. Годинава на олимпијадата во Рим учествуваа повеќе од 80.000 натпреварувачи од над 50 земји во светот.
