Генералштабот на вооружените сили на Украина утринава соопшти дека во изминатите 24 часа руските сили неуспешно се обиделе да напредуваат во правец на Купјанск и да ги вратат загубените позиции во областа Доњецк и Запорожје.
Под силен оган од руската авијација и артилерија, украинските војници продолжуваат да ја задржуваат руската офанзива во областите Авдеевка и Маринка, се наведува во извештајот, пренесува Униан.
Се тврди дека руските сили неуспешно се обиделе да ги вратат загубените позиции во правците Бахмут, Шахтјор и Запорожје.
Во исто време, украинските одбранбени сили го продолжуваат напредувањето во правец на Мелитопол и Бердјанск, каде што ги утврдуваат своите позиции, соопшти Генералштабот.
