Да ги заинтересираме младите луѓе во земјава за изучување на италијанскиот јазик, да ги унапредиме нивните јазични способности и најважно, да ги зајакнеме одличните односи со италијанскиот народ, нагласи министерот за образование и наука Јетон Шаќири на Првата национална конференција за италијанскиот јазик во Република Северна Македонија, што денес се одржа во Скопје.
„Ова е одлична прилика да продискутираме за трендовите и перспективите на активното изучување на италијанскиот јазик во земјава, како дел од националниот образовен систем и како јазик за професионални, културни и академски можности. Изминативе 5 години, италијанскиот јазик како втор странски јазик се изучува во 19 основни училишта и 8 средни училишта во земјава, а веќе втора година по ред Средното училиште на Град Скопје, гимназијата Никола Карев, запишува ученици во т.н. билингвална паралелка, каде италијанскиот јазик е застапен со 6 часа неделно, што ни дава можност да размислуваме и за отворање на ваков тип на паралелки и во други градови во Северна Македонија“, рече министерот Шаќири.
Изучувањето на италијанскиот јазик во македонскиот образовен систем датира уште од 1959 година во рамките на Катедрата за романски јазици, а веќе 13 години, италијанскиот јазик е издвоен и се изучува на посебна катедра на која досега дипломирале над 800 наставници и преведувачи.
ПОПУЛАРНО НА ИНТЕРНЕТ...
