„Во политичката консталација во овој момент е битно во Тетово да има повеќе советници од СДСМ, за да може да туркаат напред, да бидат гласни и да ги кажат и решат вашите проблеми“ изјави заменик-претседателката на СДСМ, Сања Лукаревска на претставувањето на советничката листа на СДСМ и коалицијата за изборите во општина Тетово.
Таа додаде дека кандидатите за советници се луѓето пред кои градоначалникот ќе мора да биде отчетен и транспарентен и нема да дозволат Советот да биде покритие за лажни ветувања.
„Овие советници ќе нудат решенија за скојденвните, но и најважните проблеми од вашето живеење. Да не дозволиме општината да биде парализирана и понатаму и некој да има нефункционален совет. Гласајте за број 1 за никој да не биде над вашиот глас, туку да биде во полза на вашиот глас“ рече Лукаревска.
Таа додаде дека убавите улици, тротоари, паркови и чист воздух не се политика, туку обврска која ќе ја имаат идните советници и рече дека советниците од СДСМ нема да калкулираат за да ја имаат наклонетоста на градоначалникот, туку ќе се борат за да ја оправдаат довербата на граѓаните.
