Нова спортска сала денеска беше пуштена во употреба во струмичко Муртино, а изградена е во склоп на основното училиште „Маршал Тито“. Станува збор за модерен објект од 650 квадратни метри кој е целосно опремен за повеќе спортови како одбојка, ракомет, фудбал, кошарка, пинг понг и гимнастика, а во кој Министерството за образование и наука инвестираше 23,5 милиони денари.
На отворањето на спортската сала присуствуваше министерот за образование и наука Јетон Шаќири кој рече дека со заокружувањето на оваа инвестиција исполнето е големо ветување кое е од најголем интерес на учениците, за правилно и здраво да се развиваат. Изрази надеж дека токму од ова училиште и спортска сала ќе произлезат многу нови спортисти кои ќе ги бранат боите на националните репрезентативни дресови и ќе бидат дел од големи професионални клубови.
„Верувам дека учениците и наставниците од ова училиште се презадоволни. А секако, и жителите од ова и околните населени места ќе можат да ги почувствуваат благодетите од оваа капитална инвестиција, која се реализира со средства обезбедени преку буџетот на МОН и Банката за развој при советот на Европа која ја поддржува реализацијата на капиталниот проект за изградба и опремување на училишни спортски сали и за реконструкција на постојни училишни објекти“, рече Шаќири.
Министерот информираше дека инвестициските активности на Министерството за образование и наука продолжуваат да се реализираат со забрзана динамика, затоа што, како што рече, нашата намера е што поскоро за што повеќе ученици да обезбедиме услови за образование и за спорт какви што и навистина заслужуваат.
„Во таа насока, само во моментов се градат уште три нови спортски сали, а една наскоро ќе биде започната. Градиме и 5 нови училишни објекти, а повеќе од 40 се реконструираат. Ќе споделам дека само минатата и оваа година во Струмица, со средства на МОН реконструирани се подрачните објекти на основното училиште „Сандо Масев“ во Добрејци и Бањица. Во план за 2022 е предвидена и реконструкција на основното училиште „Гоце Делчев“ во село Вељуса, со цел објектот да стане енергетски ефикасен, како и инвестиција во кровот на основното музичко училиште „Боро Џони“, рече Шаќири, додавајќи дека до 2024 година планирана е и изградба на спортска сала во основното училиште „Сандо Масев“, што ќе биде четврта сала изградена во овој град преку проектот на Министерството за образование и наука.
На пуштањето на спортската сала во ОУ „Маршал Тито“ се обрати и струмичкиот градоначалник Костадин Костадинов.
