„Човековите права, еднаквоста и недискриминацијата се високо поставени на агендата на Владата и Министерството за труд и социјална политика. Создаваме едно општество за сите. Општество во кое секој граѓанин во државата ќе ги ужива своите човекови права“, рече министерката за труд и социјална политика, Јованка Тренчевска, во своето обраќање преку видеопорака на заеднички настан на Општина Струмица и програмата „Ромактед“ во пресрет на 8 Април – Меѓународниот ден на Ромите.
Таа истакна дека во согласност со програмата на Владата 2022-2024 година и оперативниот план за активни програми и мерки за 2022 година првпат се воведува квота од 5 % за опфатеност на Ромите во сите активни програми и мерки, со што се овозможува нивно поголемо вклучување на пазарот на труд.
„Исполнувањето на еден од приоритетите и дел од програмата на Владата претставува усвојувањето на новата стратегија за инклузија на Ромите 2022-2030, со која се предвидени политики и мерки со кои се создаваат поголеми можности за инклузија за Ромите во сите општествени текови“, рече Тренчевска.
„Заедно продолжуваме да се залагаме и да имплементираме политики, преточени во реални решенија, кои придонесуваат за поголема правичност, еднаков пристап до ресурси, поголем пристап до здравство, образование, социјална заштита, вработување, домување и вклученост на Ромите во нашето општество“, порача Тренчевска.
