Градоначалничката на Скопје од ВМРО-ДПМНЕ, Данела Арсовска, не ја зборува вистината кога тврди дека исчистила 150 депонии во првите 82 дена од својот мандат, посочуваат од СДСМ.
Според нив, насекаде во Скопје, во сите општини, постојано се појавуваат нови депонии, а како што велат, постојните стојат неисчистени.
„Како што се гледа на фотографиите во прилог, добредојде на граѓаните во општина Гази Баба им посакуваат планини отпад, а слични глетки има во сите скопски општини“, стои во партиската реакција.
Според СДСМ, Арсовска во првите 100 дена на скопјани им донела стотици разочарувања.
„Од почетокот на мандатот може да се пофали само со поставување мобилни тоалети, нивелација на шахти, партизација на градските институции, прекин и застој на почнатите проекти, сериозно кратење на градскиот буџетот за животна средина“, велат од СДСМ.
