„Владата и Министерството за економија го повикаа Град Скопје во нивниот буџет за 2022 година да одделат средства за ублажување на притисокот од енергетската криза врз граѓаните. Тоа е покажување грижа за граѓаните и тоа требало да го има предвид Град Скопје“ рече министерот за економија, Крешник Бектеши во дебатата со градоначалничката на Град Скопје, Данела Арсовска во емисијата „Топ тема“ на Телма.
Тој потенцираше дека плановите за енергетската криза започнале уште во август месец минатата година, кога и се доставуваа кандидатурите за локалните избори.
„Секој што се кандидира за менаџирање на одредена општина, треба да ја знае ситуацијата и што ќе го очекува по стапувањето на функција. Кандидатурите за локалните избори се доставуваа до крај на август, кога веќе се знаеше дека ќе имаме енергетска криза. Тогаш требаше да направите план за како ќе ја менаџирате кризата“ рече Бектеши во дебатата со Арсовска.
Тој додаде дека Градот Скопје може да побара пренамена на наменските средства кои владата ѝ ги има исплатено на локалната самоуправа со цел справување со енергетската криза.
