Полициски службеници од СВР Тетово во соработка со Државниот пазарен инспекторат, синоќа во периодот од 22 до 3 часот по полноќ спровеле акциска контрола со која биле опфатени 4 угостителски објекти на тетовското и 24 угостителски објекти на гостиварското подрачје.
Како што информираат од МВР, при контролата во две казина на тетовското подрачје биле затекнати 5 лица кои не поседувале сертификати за примена вакцина против Ковид-19, потоа еден малолетник и едно лице кај кого бил пронајден и одземен нож.
На затекнатите лица како и на објектите во кои се затекнати ќе им бидат изготвени соодветни пријави.
Покрај ова, пријава ќе биде поднесена и за угостителски објект во гостиварското село Врапчиште каде било утврдено дека не се почитувале протоколите за работа.
