Отворена е промотивната канцеларија во Бардовци, која од денес им е на располагање на сите граѓани во овој реон, се вели во соопштението на општинскиот изборен штаб на СДСМ во Карпош.
– Средбата и отворањето започна со поделба на промотивен материјал и разговори за проектите предвидени во овој дел од Карпош.
Го претставивме приклучувањето на локалната канализациска мрежа во канализацискиот систем на град Скопје.
Целта на овој проект е прием на постојната канализациска мрежа во населбата во сеопфатниот градски систем. За таа намена, прво ќе биде изработена проектно-техничка документација за фекална канализација, која ќе биде во согласност со планската документација. Врз основа на тоа ќе биде утврдено кои делови од постојната мрежа ќе бидат задржани во употреба, а кои делови ќе се реконструираат.
Се планира уредување на просторот пред објектот на Месната заедница.
Целта на овој проект е да се уреди запуштениот простор во кој доминираат остатоците од старото училиште и современо да се уреди со воведување зеленило и урбана опрема, за зголемување на квалитетот на живеење во оваа атрактивна населба.
Ќе се работи и на решавање на проблемот со нелегално фрлање отпад и градежен шут по текот на р. Лепенец. Овој повеќегодишен проблем е одраз на непочитувањето на законите, но целта е во најкус рок по преземањето на мандатот, да се обезбеди доволен број комунални редари и да се подобри нивната работа. Со интензивирање
на контролите се очекува да се подигне нивото на одржување на комуналниот ред во општината, но истовремено преку санкционирање на прекршителите, да се зголемат и приходите на општинскиот буџет.
Промотивната канцеларија останува отворена за прашања и предлози. Затоа што Карпош го заслужува најдоброто, велат од СДСМ Карпош.
