Најлошото за македонскиот народ заврши со падот на режимот, СДСМ го носи најдоброто за државата, најдоброто за секоја општина, велат од СДСМ.
„Најлошото за македонскиот народ кулминираше и заврши на 27 април 2017 година со насилниот упад во Собранието. Од тогаш, секој изминат ден е подобар од претходниот, бидејќи на патот по кој одиме заедно со граѓаните е патот напред. Тоа е пат кој донесе членство во НАТО, кој ги врати слободата и демократијата, патот кој донесе повисока минимална и просечна плата и повеќе пари кај граѓаните, патот на локалниот и регионалниот развој на кои сведочиме во овие четири изминати години“, велат од СДСМ.
Од таму додаваат дека како одговорна државотворна партија, со сите сили туркаат напред кон подобра иднина, а ВМРО-ДПМНЕ и Мицкоски со сите сили кочат и се обидуваат да ја вратат државата назад, во темното минато на режимот на Груевски.
„Во ВМРО-ДПМНЕ нема никаква промена, тие и натаму се најлошата политичка опција, заедно со нивниот неформален коалициски партнер Левица. Граѓаните да бидат спокојни, со многу работа, со отворени и отчетни политики и со нови големи сојузништва го носиме најдоброто за државата, ќе го обезбедиме најдоброто во секоја наша општина“, велат од СДСМ.
