„Должност на секој претседател на партија е да остави наследство и млади луѓе кои имаат енергија. Претседател на СДСМ сум 8 години, а после нас треба да дојдат луѓе што ќе ја наследат партијата, меѓутоа со одговорност и обврска тоа да го унапредуваат, затоа што директно се рефлектира во Владата“ истакна претседателот на СДСМ и премиер на Република Северна Македонија, Зоран Заев во гостувањето на „Утрински брифинг“ запрашан за младите луѓе во раководството на партијата.
Тој додаде дека овој состав на СДСМ е авангардата што ќе влече напред и што после ќе генерира сосема ново поглавје на општественото живеење.
„Во партијата се градат структури кои ќе ја демократизираат. Да има дебата, да има различност, да има кавги на Централен и Извршен одбор, за да се калаат тие млади луѓе“ кажа Заев.
Лидерот на СДСМ објасни дека политиките во партијата се носат преку разговори во комисиите, на кои покрај раководството, учествуваат и стручни луѓе од дејноста.
„Стручните комисии се отворени. Таму имаме сериозни општественици, меѓу првите имиња во било која од областите кои членуваат или помагаат“ кажа Заев.
