Градоначалникот на Скопје, Петре Шилегов, најави уште еден голем проект за жителите на главниот град – изведбата на клучката кај Момин Поток, која е една од двете главни рути што ги поврзуваат северниот и јужниот дел од градот.
„Се работи за огромен проект во вкупна вредност од речиси 18 милиони евра за кој постапката ја почнавме вчера, градежните работи ќе ги почнеме во текот на јуни, а изведбата треба да трае 2-2,5 години. Според својата комплексност, се работи за убедливо најсложениот сообраќаен проект што Град Скопје го има изработено од 1965 година, па наваму. Малку поедноставен е проектот за клучката кај хотелот „Континентал“. Со цел да се намали сообраќајниот метеж на овој потег, се предвидува изградба на 2 кружни тека – првиот треба да ја замени крстосницата кај булеварот 8 Септември и улицата Скупи и вториот, кој треба да ја замени крстосницата на булеварот Никола Карев и патот кон Визбегово, обиколницата и косовската граница. Од вториот кружен тек улицата продолжува до крстосницата со булеварот Словенија, каде што се поврзува со булеварот Босна и Херцеговина. Оваа сообраќајница е една од клучните градски сообраќајници бидејќи дневно овде поминуваат 25.000 возила и метежот е голем“ рече Шилегов на денешната прес-конференција.
Вкупната должина на сообраќајницата меѓу двата кружни тека и пред раскрсницата со булеварот Словенија изнесува околу 1.600 метри. По должина на целата сообраќајница ќе биде поставено најсовремено лед булеварско осветление, пешачки и велосипедски патеки од двете страни на коловозот. Проектот предвидува и изградба на 2 моста на реката Серава, која тече под оваа сообраќајница.
