Благодарение на заедничкиот дипломатски подвиг, на денешен ден во 2019 година во историска посета на Република Северна Македонија 🇲🇰 дојде Алексис Ципрас, како прв премиер од Грција 🇬🇷 кој ја посетил државата, напиша премиерот Зоран Заев.
Со потпишувањето на Договорот од Преспа ги премостивме речиси тридецениските разлики како два соседи, ставивме крај на тензиите меѓу нашите земји и воспоставивме ново стратешко партнерство.
Оваа историска спогодба коренито ја промени перспективата на евроатлантските интеграции на Северна Македонија и од патник на слеп колосек денес нашата држава е полноправна членка на НАТО и посакуван партнер во Европската Унија.
Како дел од семејството на НАТО, Северна Македонија ги споделува демократските вредности и начелата на солидарност со останатите членки, а Грција се грижи за безбедноста на нашето небо.
Договорот од Преспа во правни рамки дополнително го заштити нашиот македонски идентитет и култура, како и посебноста на македонскиот јазик, којшто е темел на нашата самобитноста и автохтоноста на нацијата.
Духот на Преспанскиот договор втемелен на взаемно почитување и соработка е препознаен како позитивен пример во меѓународната јавност, за што говорат бројните конференции, анализи и истражувања, како и престижни меѓународни награди кои во изминатиот период ни беа доделени мене и на поранешниот премиер Ципрас, напиша Заев.
