Пред само два дена кога излезе скандалот дека Заев лично ѕвонел да се пропуштат луѓе на граничниот премин Деве Баир, од Владата испратија соопштение дека тоа се груби манипулации, а вчера Заев сам призна дека се јавил кај службеничка по име Виолета, посочи на денешната прес-конференција Димче Арсовски од ВМРО-ДПМНЕ.
Портпаролот на опозициската партија обвини дека под превезот оти бил загрижен за граѓаните што чекаат и сакал да им помогне, премиерот извршил злоупотреба на службената должност и извршил влијание врз службеничката, која ниту смее да прима наредби од него ниту, пак, да постапува.
„Таа единствено смее да постапува во согласност со законските можности и одговорноста што ја сноси на работното место, вклучително по наредба на своите претпоставени, а претпоставен не ѝ е Зоран Заев“, рече Арсовски, според кого скандалозно е и што едно од возилата било странско од Косово, со косовски државјани, што, како што рече портпаролот, е спротивно на она што го говорела државата дека биле македонски државјани.
Воедно, претставникот на опозициската партија вели дека, според нивните информации, службеничката со која Заев зборувал и тврди дека не ја познавал, се вика Виолета Ангеловска, мајка на екссоветник од редовите на СДСМ, Дарко Ангеловски, кој сега е вработен од СДСМ во МВР како инспектор.
„И службеничката Виолета и нејзиниот син се партиски членови на СДСМ за кои Заев вели не ги познава, а им се јавил, односно ѝ се јавил на службеничката. Повторно лаже“, заклучи Арсовски.
