Стоте дена од старо-новата Влада се продолжение на низата промашувања, криминал и силни неуспеси, што трае четири долги години, рече денеска на прес-конференција лидерот на ВМРО-ДПМНЕ, Христијан Мицкоски.
Според него, овие 100 дена од вториот мандат на Владата се најлошите 100 дена на која било влада што досега била на чело на современата македонска држава.
„Ветуваа живот, а по оној предизборен инжерениг во избори во кои се служеа со сè, само не со предизборна програма, уценуваа, се закануваа, поткупуваа, менуваа закони, буквално сè, само не со политичка платформа, составија влада со ветување ‘Можеме подобро’, а за 100 дена добивме вето на патот кон ЕУ, влеговме во економска рецесија, пропадна банка – втора ТАТ-афера тешка 200 милиони евра, поскапе електричната енергија, 1.400 животи се загубија поради отсуство на стратегија и акутна неспособност во здравството“, посочи лидерот на опозициската партија.
Според Мицкоски, оваа власт не знае како во економијата, во здравството е хаотична, а во надворешната политика, наместо со принципи и мудрост, постојано се коцка со идентитетските прашања.
„И многу лажат, но тоа за нив е веќе секојдневие“, додаде тој.
Во своето излагање Мицкоски посочи дека Владата на Заев носи замо загуби и потоа наброи низа од нив во сферите на економијата, здравството, земјоделството, образованието и инфраструктурата.
Според него, оваа Влада била потресена и од многу скандали и афери, а на крајот го спомена и ветото за ЕУ.
„Требаше да добиеме датум за преговори, но добивме вето. Вето што не е само кочница за иднината, туку и израз на исклучителната неспособност на Владата, на Зоран Заев и на неговата домат-меѓународна политика. По четири години лаги дека само што не сме почнале преговорите, денес е јасно дека имаме Влада што не може да испорача европска иднина“, рече претседателот на ВМРО-ДПМНЕ.
Според Мицкоски, Владата на Заев не успеала во намерата да се откаже од идентитетот затоа што, како што рече, се случил народ.
Сепак, нагласи дека додека Заев е премиер, идентитетот и иднината на земјата се под закана.
