Владата, синоќа, во рамките на 19-тата седница, го утврди предлог-буџетот на Република Северна Македонија за 2021 година, кој ќе биде доставен во Собранието и деновиве ќе биде детаљно презентиран пред јавноста.
Владата донесе и одлука 400 компании да добијат 17,2 милиони евра, средства што се дел од третиот пакет-мерки, со цел амортизирање на ударот врз домашните погодени бизниси преку стимулирање на приватната потрошувачка со фокус на домашната понуда, директна финансиска поддршка и поддршка за ликвидноста на приватниот сектор и работните места.
Висината на финансиската поддршка е 25 % од реализираната инвестиција според инвестицискиот план, но не повеќе од:
– 40.000 евра во денарска противвредност за деловни субјекти што оствариле вкупен приход во 2019 година не повисок од 1.000.000 евра во денарска противвредност;
– 100.000 евра во денарска противвредност за деловни субјекти што оствариле вкупен приход во 2019 година – од 1.000.001 евро до 10.000.000 евра во денарска противвредност;
– 140.000 евра во денарска противвредност за деловни субјекти што оствариле вкупен приход во 2019 година – од 10.000.001 евро до 50.000.000 евра во денарска противвредност;
– 200.000 евра во денарска противвредност за деловни субјекти што оствариле вкупен приход во 2019 година – од 10.000.001 евро, повеќе од 50.000.000 евра во денарска противвредност.
Детаљните информации за доделувањето на финансиската помош ќе бидат презентирани во јавноста од претставници на Владата во наредните денови.
На седницата е донесена одлука за одобрување средства од буџетот за 2020 година во износ од 77.000.000 на Општина Кичево за реконструкција на општинската зграда, како и 135.000.000 денари на Град Скопје како неповратна финансиска помош за справување со финансиските последици предизвикани поради кризата од коронавирусот во работењето на Јавното сообраќајно претпријатие Скопје.
