И во време на сериозна здравствена криза и пандемија, јасна е разликата меѓу одговорниот, транспарентен и чесен пристап на СДСМ и незрелиот, неодговорен и политикантски однос на ВМРО-ДПМНЕ.
Додека СДСМ во целост ги почитува мерките и задолженијата, дејствува строго по утврдените протоколи, ВМРО-ДПМНЕ на чело со Христијан Мицкоски секојдневно ги крши мерките и задолженијата и ги прекршува забраните за јавни собири.
За претстојната кампања веќе изготвивме протокол по кој ќе се одвиваат сите наши предизборни и партиски активности.
Тоа значи дека сите присутни на јавен настан или состанок организиран од СДСМ мора да носат заштитна маска, да одржуваат растојание од 2 метри. Групирањето е забрането, а бројот на присутни на јавни настани и средби ќе биде со строга контрола, со најмногу 50 лица на јавна локација и 30 во затворен простор, со задолжителна физичка дистанца.
Заради заштита на населението од коронавирус СДСМ ќе води кампања која ќе биде без настани на отворено со повеќе од 50 граѓани во публика; без настани на затворено со повеќе од 30 граѓани во публика; без митинзи и без активности од „врата до врата“.
И додека СДСМ функционира исклучиво во заштита на здравјето на сите граѓани, ВМРО-ДПМНЕ свесно и намерно ги крши сите протоколи и мерки за заштита со што здравјето на граѓаните го доведува во опасност.
Последен пример е партискиот собир на ВМРО-ДПМНЕ во Лисиче кога и самиот Мицкоски ја прекрши забраната за собири и учествуваше во масовен собир каде што имаше и физички поздравувања, не се држеше дистанца, а маски ретко кој и да носеше.
Јавноста беше сведок и како Мицкоски посетуваше тератани, се групираше на јавни места, како седел во дел од ресторан кој не смеел да работи, а за сето тоа време неговиот Наќе Чулев не реагираше ниту еднаш.
Тоа се Мицкоски и ВМРО-ДПМНЕ. Напладне глумат загриженост за јавното здравје, а попладне истото го загрозуваат со кршење на мерките и забраните.
Ова е јасна разлика помеѓу вистинска грижа за здравјето на граѓаните од страна на СДСМ и свесно загрозување на јавното здравје од страна на ВМРО-ДПМНЕ и Мицкоски.
Затоа, ве повикувам секој еден од нас да биде дел од решението со коронавирусот и да ги почитува мерките за заштита.
Да го чуваме здравјето и на 15 јули да победиме и да ја пребродиме оваа криза заедно, единствени и сплотени, како што ни доликува.
