Туристите повторно ќе може да доаѓаат во јули, им кажа денеска на пратениците еден од главните функционери на грчката влада.
-За туризам ќе се отвориме од 1 јули, кажа во парламентот државниот министер Јоргос Герапетритис.
Деталите за повторното придвижување на туристичката индустрија, вклучувајќи ја финансиската поддршка, ќе се утврдат на 15 мај.
Најавата на Герапетритис е во иста насока со изјавата на премиерот Кирјакос Мицотакис од интервјуто за Си-ен-ен во понеделникот дека прво мора да се утврдат протоколите за безбедно патување.
Туристичката индустрија сочинува 30 отсто од грчкиот БДП и дава најголем поединечен придонес на буџетот.
Пандемијата на коронавирусот создаде паника меѓу хотелиерите, туристичките агенции, угостителите и стопанските гранки поврзани со нив, а една третина се плашат од пропаѓање.
Владата процени дека земјата поради пандемијата изгубила 22 милијарди евра и 45.000 работни места.
